🏆 राज्यस्तरावर सामाजिक कार्याचा गौरव! गलवाडा (वेताळवाडी) ता.सोयगाव येथील सुरेखा तायडे यांना ‘महाराष्ट्र गौरव पुरस्कार २०२६’

दिशा लाईव्ह न्यूज-:- सोयगाव, ता. ६ (प्रतिनिधी) : समाजसेवेची निस्वार्थ भावना, लोकहितासाठी सातत्याने केलेले कार्य आणि ग्रामीण भागातील महिलांच्या सक्षमीकरणासाठी दिलेले मोलाचे योगदान याची राज्यस्तरावर दखल घेत सोयगाव तालुक्यातील गलवाडा (वेताळवाडी) येथील माजी सरपंच सौ. सुरेखा तायडे यांना प्रतिष्ठेचा ‘महाराष्ट्र गौरव पुरस्कार २०२६’ प्रदान करून सन्मानित करण्यात आले. त्यांच्या या उल्लेखनीय यशामुळे संपूर्ण सोयगाव तालुका आणि गलवाडा गावाच्या शिरपेचात मानाचा तुरा रोवला गेला आहे.

पुणे येथील पंडित जवाहरलाल नेहरू नाट्यगृहात आनंदी फाउंडेशनच्या वतीने आयोजित करण्यात आलेल्या भव्य ‘महाराष्ट्र गौरव पुरस्कार सोहळा–२०२६’ मध्ये अभिनेत्री पूजा वाघ तसेच आनंदी फाउंडेशनचे संस्थापक-अध्यक्ष गणेशजी विटकर यांच्या हस्ते सौ. सुरेखा तायडे यांना पुरस्कार, सन्मानचिन्ह व प्रशस्तीपत्र देऊन गौरविण्यात आले. कार्यक्रमास राज्यभरातील विविध क्षेत्रांत उल्लेखनीय कार्य करणाऱ्या व्यक्तींची उपस्थिती लाभली होती.

सौ. सुरेखा तायडे यांनी माजी सरपंच म्हणून गावाच्या विकासासाठी तसेच सामाजिक क्षेत्रात महिलांचे सक्षमीकरण, जनजागृती, गरजूंना मदतीचा हात, सामाजिक ऐक्य आणि लोकहिताच्या विविध उपक्रमांमध्ये सातत्याने योगदान दिले आहे. त्यांच्या कार्यातून समाजातील अनेकांना प्रेरणा मिळाली असून, समाजसेवा हीच खरी लोकसेवा असल्याचा संदेश त्यांनी आपल्या कृतीतून दिला आहे.

ग्रामीण भागातील महिलांना नेतृत्वाची संधी मिळावी, त्या सामाजिक आणि सार्वजनिक जीवनात सक्रिय व्हाव्यात यासाठी त्यांनी केलेले प्रयत्न विशेष कौतुकास्पद ठरले आहेत. त्यांच्या या कार्याची राज्यस्तरावर दखल घेत हा मानाचा पुरस्कार प्रदान करण्यात आला.

या सन्मानामुळे गलवाडा (वेताळवाडी) गावासह संपूर्ण सोयगाव तालुक्याचा गौरव वाढला असून, विविध सामाजिक, राजकीय, शैक्षणिक आणि सांस्कृतिक क्षेत्रातील मान्यवरांनी त्यांचे अभिनंदन केले आहे. सामाजिक कार्यात योगदान देणाऱ्या महिलांसाठी त्यांचा हा सन्मान प्रेरणादायी ठरणार असून, भविष्यातही त्यांच्या हातून समाजोपयोगी कार्य अधिक जोमाने घडावे, अशा शुभेच्छा सर्व स्तरांतून व्यक्त होत आहेत.

समाजासाठी निस्वार्थ सेवा करणाऱ्यांचा सन्मान म्हणजे समाजातील सकारात्मक कार्याला मिळालेली खरी पावती. सौ. सुरेखा तायडे यांचा हा गौरव संपूर्ण परिसरासाठी अभिमानाची बाब आहे.

— दिशा लाईव्ह न्यूज "जनतेचा विश्वास... शेतकऱ्यांचा आवाज."