पहूर पोलिसांची धडाकेबाज कारवाई; मोटारसायकल चोरीच्या गुन्ह्यात आरोपी अटक, दोन चोरीच्या दुचाकी हस्तगत

पहूर प्रतिनिधी- ता. जामनेर

दिशा लाईव्ह न्यूज -:- : जळगाव जिल्ह्यात वाढत्या मोटारसायकल चोरीच्या घटनांना आळा घालण्यासाठी पहूर पोलिसांनी धडाकेबाज कारवाई करत एका संशयित आरोपीला अटक केली आहे. आरोपीकडून चोरीच्या दोन मोटारसायकली हस्तगत करण्यात आल्याने परिसरातील वाहनचोरीच्या गुन्ह्यांचा तपास पुढे जाण्याची शक्यता निर्माण झाली आहे.

पहूर पोलिस ठाण्यात दाखल असलेल्या मोटारसायकल चोरीच्या गुन्ह्याचा तपास सुरू असताना पोलिसांना गोपनीय माहिती मिळाली. या माहितीच्या आधारे पोलिसांनी आकाश सुभाष गुजर (वय २८, रा. नाचणखेडा, ता. जामनेर) याला ताब्यात घेतले.

पोलिसांच्या चौकशीदरम्यान सुरुवातीला त्याने उडवाउडवीची उत्तरे देत माहिती देण्याचे टाळले. मात्र, पोलिसांनी त्याला विश्वासात घेऊन कसून चौकशी केली असता त्याने मोटारसायकल चोरी केल्याची कबुली दिल्याचे पोलिसांनी सांगितले. त्याच्या ताब्यातून हिरो फॅशन प्रो आणि हिरो स्प्लेंडर या दोन मोटारसायकली हस्तगत करण्यात आल्या आहेत.

हस्तगत करण्यात आलेल्या दोन्ही दुचाकींची एकूण अंदाजे किंमत ४० हजार रुपये असल्याचे पोलिसांनी नमूद केले आहे. त्यामुळे या कारवाईतून चोरीस गेलेल्या वाहनांचा शोध घेण्यात पहूर पोलिसांना महत्त्वपूर्ण यश मिळाले आहे.

वरिष्ठ अधिकाऱ्यांच्या मार्गदर्शनाखाली कारवाई

ही कारवाई जिल्हा पोलिस अधीक्षक श्रीकांत धिवरे, अपर पोलिस अधीक्षक अशोक नखाते आणि उपविभागीय पोलिस अधिकारी बापू रोहम यांच्या मार्गदर्शनाखाली करण्यात आली.

कारवाईत पोलिस निरीक्षक प्रवीण दात्रे, पोलिस उपनिरीक्षक गणेश सुस्ते, पोलिस कर्मचारी सचिन चौधरी, राहुल पाटील, दीपक पाटील, ईश्वर कोकणे, सत्यवान कोळी, विकास गायकवाड तसेच चालक पोलिस हेमंत सोनवणे यांनी सहभाग घेतला.

या प्रकरणाचा पुढील तपास पोलीस नाईक दीपक पाटील करीत आहेत. आरोपीकडून हस्तगत करण्यात आलेल्या दुचाकी नेमक्या कोणत्या गुन्ह्यातील आहेत, तसेच या चोरीच्या प्रकरणामागे आणखी कोणी सहभागी आहे का, याचा तपास पोलिसांकडून करण्यात येत आहे.

पहूर पोलिसांच्या या कारवाईमुळे मोटारसायकल चोरीच्या घटनांवर नियंत्रण मिळविण्यासाठी पोलिस यंत्रणा सक्रिय असल्याचे स्पष्ट झाले असून, वाहनमालकांमध्येही या कारवाईमुळे दिलासा व्यक्त होत आहे.