जामनेर-पहूर मार्गावर गोंदेगाव जवळ भीषण अपघात शालेय पोषण आहाराचा ४०७ टेम्पो उलटला; पाचोऱ्यातील दोन हमालांचा जागीच मृत्यू!-

दिशा लाईव्ह न्यूज --::-- जामनेर-पहूर मार्गावरील शेंदुर्णीजवळ शालेय पोषण आहाराची वाहतूक करणाऱ्या ४०७ टेम्पोला मंगळवारी भीषण अपघात झाला. टेम्पोचा अचानक टायर फुटल्याने चालकाचे वाहनावरील नियंत्रण सुटले आणि वाहन रस्त्यावर उलटले. या दुर्घटनेत टेम्पोमधील पोषण आहाराच्या गोण्यांवर बसलेल्या दोन हमालांचा वाहनातून बाहेर फेकले गेल्याने जागीच मृत्यू झाला.

मृतांमध्ये जगदीश लालचंद पाटील (रा. कृष्णापुरी, पाचोरा) आणि अर्जुन तुकाराम पाटील (रा. बहिरम नगर, पाचोरा) यांचा समावेश आहे.

             टायर फुटल्याने चालकाचा ताबा सुटला

मिळालेल्या माहितीनुसार, शालेय पोषण आहार पाचोरा येथून ४०७ टेम्पोमध्ये भरून नेण्यात येत होता. या वाहतुकीदरम्यान दोन्ही हमाल पोषण आहाराच्या गोण्यांवर बसले होते. शेंदुर्णीजवळ अचानक टेम्पोचा टायर फुटल्याने चालकाचा वाहनावरील ताबा सुटला. त्यानंतर टेम्पो रस्त्यावर पलटी झाला.

अपघाताची तीव्रता एवढी होती की, गोण्यांवर बसलेले दोन्ही हमाल वाहनाबाहेर फेकले गेले. गंभीर दुखापत झाल्याने त्यांचा घटनास्थळीच मृत्यू झाला. घटनेची माहिती मिळताच परिसरात खळबळ उडाली.

            पोषण आहाराच्या वाहतुकीवर प्रश्नचिन्ह?

या अपघातानंतर शालेय पोषण आहाराच्या वाहतुकीच्या व्यवस्थेवर गंभीर प्रश्न उपस्थित झाले आहेत. मालवाहू वाहनामध्ये कामगारांना पोषण आहाराच्या गोण्यांवर बसवून नेणे कितपत सुरक्षित व नियमबद्ध आहे, असा सवाल उपस्थित होत आहे.

तसेच संबंधित वाहनाची वाहतूक क्षमता, फिटनेस प्रमाणपत्र, परमिट, विमा तसेच इतर आवश्यक कागदपत्रे वैध होती का, याची चौकशी करण्याची मागणी होत आहे. पाचोरा येथून निघालेला पोषण आहार नेमक्या कोणत्या केंद्रासाठी जात होता आणि या वाहतुकीचे कंत्राट कोणाकडे होते, याचीही सखोल चौकशी करण्याची मागणी नागरिकांकडून केली जात आहे.

                        दोन कुटुंबांवर दुःखाचा डोंगर

या दुर्घटनेत दोन कष्टकरी हमालांचा मृत्यू झाल्याने त्यांच्या कुटुंबीयांवर दुःखाचा डोंगर कोसळला आहे. पाचोरा शहरातील कृष्णापुरी आणि बहिरम नगर परिसरात या घटनेमुळे हळहळ व्यक्त करण्यात येत आहे.

                       पहूर पोलिसांकडून तपास सुरू

अपघाताची माहिती मिळताच पहूर पोलिसांनी घटनास्थळी धाव घेतली. पोलिसांनी घटनास्थळाचा पंचनामा करून पुढील तपास सुरू केला आहे. अपघात नेमका कोणत्या परिस्थितीत झाला, वाहनाची स्थिती काय होती आणि वाहतुकीदरम्यान नियमांचे पालन झाले होते का, याचा तपास केला जात आहे.

दरम्यान, हा अपघात केवळ टायर फुटल्यामुळे झाला म्हणून प्रकरण मर्यादित न ठेवता संपूर्ण वाहतूक प्रक्रियेची चौकशी करावी. निष्काळजीपणा किंवा नियमभंग आढळल्यास संबंधितांवर कठोर कारवाई करावी तसेच मृत कामगारांच्या वारसांना शासनाकडून योग्य आर्थिक मदत मिळावी, अशी मागणी होत आहे.