हुंडाबळीने काळवंडले 'भाग्यश्री 'चे भाग्य जंगीपुरा ,ता.जामनेर येथील विवाहितेचा खून की आत्महत्या ? खुनाचा गुन्हा दाखल करण्यासाठी मृतदेहासह पोलीस ठाण्यात ठिय्या ! पतीसह सासरच्या चौघांवर गुन्हा

दिशा लाईव्ह न्यूज -:- पहूर प्रतिनिधी-:-   ता  .जामनेर ( ता . ८)  वाळूवाहतूक करण्याचे डंपर घेण्यासाठी माहेराहून २० लाख रुपये हुंड्याच्या स्वरूपात घेऊन यावे यासाठी शारीरिक व मानसिक त्रास देऊन अखेर गळफास देऊन विवाहितेस फाशी देवून जीवे मारून टाकल्याची घटना जंगीपुरा (ता . जामनेर )येथे आज बुधवारी ( ता . ८ ) पहाटेच्या सुमारास घडली . 

      भाग्यश्री राहुल परदेशी ( वय २८ ) असे मयत विवाहितेचे नाव असून  बुधवारी रात्री २ ते सकाळी ६ वाजेच्या दरम्यान पती राहुल परदेशी सह सासू रेखाबाई राजपूत  सासरे गोविंद राजपूत व  दीर  सुनील राजपूत यांनी संगनमताने गळफास देऊन जीवे मारून टाकल्याची फिर्याद विवाहितेची वडील  सरदार बाबुलाल परदेशी रा .  पांगरा , ( ता . कन्नड , जि . छत्रपती संभाजी नगर )  यांनी दिली आहे .

    

                माहेरच्या नातेवाईकांचा ठिय्या

भाग्यश्री राजपूत हिच्या मृत्यूस कारणीभूत ठरलेल्या सासरच्या लोकांविरुद्ध खुणाचा गुन्हा दाखल करण्यासाठी माहेरच्या नातेवाईकांनी  पोलीस ठाण्याच्या आवारात ठिय्या मांडला . जोपर्यंत गुन्हा दाखल होत नाही तोपर्यंत मृतदेह हलवणार नाही असा आक्रमक पवित्रा नातेवाईकांनी घेतला .

              चौघांवर गुन्हा दोघे अटकेत

विवाहितेचा हूंड्यासाठी शारीरिक व मानसिक छळ करून मृत्यूस कारणीभूत ठरल्याबद्दल सासरच्या चौघांविरुद्ध   गुन्हा नोंदविण्यात आला असून पती राहुल राजपूत व सासू रेखा राजपूत यांना तात्काळ अटक करण्यात आली आहे .

        उपविभागीय पोलीस अधिकाऱ्यांची भेट -

घटनेची माहिती मिळताच तात्काळ घटनास्थळी पाचोरा उपविभागीय पोलीस अधिकारी बापू रोहाम यांनी भेट देऊन परिस्थिती जाणून घेतली . पहूर पोलीस ठाण्याचे सहाय्यक पोलीस निरीक्षक प्रमोद कठोरे यांनीही घटनास्थळी धाव घेऊन परिस्थिती नियंत्रणात आणली .

 पुढील तपास पोलीस उपनिरीक्षक  नंदकुमार शिंब्रे करीत आहेत .

           तीन वर्षाचा चिमुकल्याचे हरपले मातृछत्र

भाग्यश्री  राजपूत यांच्या दुर्दैवी मृत्यूमुळे तीन वर्षाच्या यशचे मातृछत्र हरपले असून भाग्यश्रीचे भाग्य हुंडाबळीने काळवंडले असल्याच्या संतप्त भावना माहेरच्या नातेवाईकांनी व्यक्त केल्या .

         शोकाकुल वातावरणात अंत्यसंस्कार

मयत भाग्यश्री राजपूत यांच्यावर सायंकाळी ७ वाजता  जंगीपुरा येथे पोलीस बंदोबस्तात शोकाकुल वातावरणात अंत्यसंस्कार करण्यात आले .  चिमुकल्या यशने आपल्या आईच्या चितेस अग्नीडाग देताना वातावरण भावूक झाले होते .

(पहूर - खुनाचा गुन्हा दाखल व्हावा या मागणीसाठी पोलीस ठाण्याच्या आवारात ठिय्या मांडून बसलेले नातेवाईक .)