अक्सा नगर, शेंदुर्णी येथे गटारीच्या पाण्याचा प्रश्न तीव्र; नगरपंचायतीच्या निष्क्रियतेमुळे नागरिक त्रस्त!!

शेंदुर्णी -(प्रतिनिधी):

दिशा लाईव्ह न्यूज --::--जामनेर तालुक्यातील शेंदुर्णी येथील अक्सा नगर परिसरात सध्या अक्षरशः घाणीचे साम्राज्य निर्माण झाले असून गटारीच्या साचलेल्या पाण्यामुळे नागरिकांचे आरोग्य धोक्यात आले आहे. अनेक दिवसांपासून गटाराचे दूषित पाणी रस्त्यावर साचत असल्याने परिसरात दुर्गंधी पसरली असून डासांचे प्रमाण वाढले आहे. परिणामी, नागरिकांमध्ये आजारांची भीती निर्माण झाली आहे.

विशेष म्हणजे, स्थानिक पत्रकार शेख हमीद यांच्या घराजवळूनच गटाराचे घाण पाणी वाहत असल्यामुळे परिस्थिती अधिक गंभीर झाली आहे. परिसरातील नागरिकांनी अनेक वेळा नगरपंचायतीकडे तक्रारी करूनही प्रशासनाने या समस्येकडे पूर्णतः दुर्लक्ष केल्याचा आरोप केला जात आहे. तक्रारी करूनही कोणतीही ठोस उपाययोजना न केल्यामुळे नागरिकांमध्ये संतापाची भावना निर्माण झाली आहे.

अक्सा नगरमधील रहिवाशांचे म्हणणे आहे की, गटाराची सध्याची व्यवस्था पूर्णपणे अपुरी असून पावसाळ्यात परिस्थिती आणखी बिकट होण्याची शक्यता आहे. सांडपाणी थेट रस्त्यावर साचत असल्यामुळे लहान मुले, ज्येष्ठ नागरिक आणि महिलांना मोठा त्रास सहन करावा लागत आहे. यामुळे मलेरिया, डेंग्यू, टायफॉईडसारख्या आजारांचा धोका वाढत असल्याची भीती व्यक्त केली जात आहे.

नागरिकांनी वारंवार मागणी करूनही नगरपंचायतीने नवीन गटार बांधकामासंदर्भात कोणतीही ठोस पावले उचलली नसल्यामुळे नागरिकांनी प्रशासनाच्या कार्यपद्धतीवर प्रश्नचिन्ह उपस्थित केले आहे. “कर वसुली वेळेवर केली जाते, मात्र मूलभूत सुविधा देताना प्रशासन उदासीन का?” असा सवाल स्थानिकांकडून उपस्थित केला जात आहे.

यासंदर्भात नागरिकांनी स्पष्ट इशारा दिला आहे की, गटाराच्या घाण पाण्यामुळे परिसरात कोणालाही आजार झाल्यास त्यास पूर्णपणे नगरपंचायत जबाबदार राहील. तसेच, ही समस्या तात्काळ सोडवली नाही तर नागरिकांना आंदोलनाचा मार्ग अवलंबावा लागेल, असा इशाराही देण्यात आला आहे.

दरम्यान, अक्सा नगर परिसरातील या गंभीर समस्येकडे वरिष्ठ अधिकाऱ्यांनी तात्काळ लक्ष घालून गटारीचे पाणी वाहून जाण्यासाठी योग्य व्यवस्था करावी, तसेच नवीन गटार बांधकामास मंजुरी देऊन कायमस्वरूपी तोडगा काढावा, अशी जोरदार मागणी नागरिकांकडून केली जात आहे.

— नागरिकांच्या आरोग्याशी संबंधित प्रश्नावर प्रशासन कधी जागे होणार? असा सवाल आता सर्वसामान्यांमधून उपस्थित होत आहे.