आईच्या त्यागाने वाचला मुलाचा जीव ! आईने केले किडनी दान; प्रत्यारोपण शस्त्रक्रिया यशस्वी ! मातृदिन विशेष

                                    मातृदिन विशेष

पहूर प्रतिनिधी-- ता. जामनेर :

दिशा लाईव्ह न्यूज --::--आई म्हणजे माया, त्याग आणि निःस्वार्थ प्रेम याचं जिवंत रूप… आणि याच ममतेचं थरारक, डोळे पाणावणारे उदाहरण पहूर येथे समोर आले आहे. स्वतःच्या मुलाचा जीव वाचवण्यासाठी आईने स्वतःची किडनी दान करून त्याला अक्षरशः नवजीवन दिल्याची हृदयस्पर्शी घटना घडली आहे. मातृदिनाच्या निमित्ताने या घटनेने “आई हीच खरी देवता” असल्याचा प्रत्यय पुन्हा एकदा दिला आहे.

ही भावनिक कहाणी आहे जामनेर तालुक्यातील पहूर कसबे येथील रहिवासी कुंदन अमृत वानखेडे (वय ३१) आणि त्यांच्या आई सौ. लिलाबाई अमृत वानखेडे या माय-लेकांची.

कुंदन यांनी एम.एस्सी (ऍग्री) शिक्षण पूर्ण करून मुंबईतील छत्रपती शिवाजी महाराज टर्मिनस येथे केंद्र सरकारच्या आधार सेंटरवर कंत्राटी पद्धतीने नोकरी सुरू केली होती. आयुष्य सुरळीत सुरू असतानाच अचानक त्यांच्या प्रकृतीत बदल जाणवू लागला. चेहरा आणि पाय सुजणे, अशक्तपणा अशी लक्षणे दिसू लागली. सुरुवातीला मुंबईत उपचार घेतले, मात्र प्रकृतीत सुधारणा न झाल्याने ते गावाकडे परतले.

यानंतर वडिलांसोबत जळगाव येथील नीलकमल हॉस्पिटलमध्ये त्यांनी तपासणी केली. डॉ. मनोज टोके यांनी तपासणीनंतर धक्कादायक निदान केले—कुंदन यांच्या दोन्ही किडण्या तब्बल ९० टक्के निकामी झाल्या होत्या. ही बातमी ऐकून संपूर्ण कुटुंबावर दुःखाचा डोंगर कोसळला.

तत्काळ पुढील उपचारासाठी कुंदन यांना छत्रपती संभाजीनगर येथील सिग्मा हॉस्पिटलमध्ये दाखल करण्यात आले. तेथे डॉ. प्रदीप सारूक यांनी सविस्तर तपासणीनंतर स्पष्ट सांगितले की, कुंदनचा जीव वाचवायचा असेल तर किडनी प्रत्यारोपण हाच एकमेव पर्याय आहे.

आता सर्वात मोठा प्रश्न उभा राहिला—किडनी कोण देणार?

या निर्णायक क्षणी आई सौ. लिलाबाई यांनी क्षणाचाही विलंब न लावता पुढे येत ठाम शब्दांत सांगितले, “माझ्या लेकासाठी मी तयार आहे!” आईच्या या निर्धाराने सगळ्यांच्या डोळ्यांत पाणी आले.

यानंतर त्यांच्या तपासण्या करण्यात आल्या. सुदैवाने आई आणि मुलाच्या तपासण्या जुळल्या आणि किडनी प्रत्यारोपणाचा मार्ग मोकळा झाला. अखेर ८ एप्रिल २०२६ रोजी वैद्यकीय पथकाच्या उपस्थितीत ही जटिल शस्त्रक्रिया यशस्वीरित्या पार पडली.

या क्षणी जणू आईने आपल्या मुलाला दुसऱ्यांदा जन्म दिला… ऑपरेशन थिएटरच्या बाहेर उभ्या असलेल्या कुटुंबीयांच्या डोळ्यांत अश्रू होते—दुःखाचे नव्हे, तर आनंदाचे!

सध्या कुंदन आणि त्यांच्या आई छत्रपती संभाजीनगर येथे डॉक्टरांच्या देखरेखीखाली उपचार घेत असून त्यांची प्रकृती सुधारत आहे. लवकरच ते आपल्या गावी परतणार आहेत.

मातृदिनाच्या दिवशी ही घटना प्रत्येकाच्या मनाला स्पर्श करून जाते. आईच्या त्यागाची, प्रेमाची आणि नात्याच्या गाठीची ही जिवंत साक्ष आहे.

खरंच…

“आई ही आईच असते… तिच्या प्रेमाला, त्यागाला आणि मायेच्या किमतीला कोणतीही मोजमाप नाही!”