लोहारा येथील डॉ.जे.जी.पंडित विद्यालयाच्या गुणवंत विद्यार्थ्यांच्या यशाने शाळेच्या शिरपेचात मानाचा तुरा; मुख्याध्यापक व शिक्षकांच्या अथक परिश्रमाला यशाची सुवर्णकिनार

दिशा लाईव्ह न्यूज -(  दिनेश चौधरी, लोहारा )--ज्ञान, शिस्त आणि संस्कार यांचा सुंदर संगम जपत विद्यार्थ्यांच्या सर्वांगीण विकासासाठी सातत्याने प्रयत्नशील असलेल्या डॉ.जे.जी. पंडित माध्यमिक विद्यालय, लोहाराने यंदाच्या इयत्ता पाचवी शिष्यवृत्ती परीक्षा २०२६ मध्ये घवघवीत यश संपादन करत आपल्या यशस्वी परंपरेवर पुन्हा एकदा शिक्कामोर्तब केले आहे. शाळेचे तब्बल १० विद्यार्थी मेरिट यादीत स्थान मिळवत विद्यालयाचे, पालकांचे आणि संपूर्ण परिसराचे नाव उज्ज्वल केले आहे.

विद्यालयातील विद्यार्थ्यांनी अभ्यासातील सातत्य, जिद्द आणि मेहनतीच्या जोरावर हे यश मिळविले असून, या यशामागे कर्तव्यदक्ष मुख्याध्यापक श्री. पी. एम. सुर्वे, उपमुख्याध्यापक श्री. आर. जी. बैरागी तसेच सर्व शिक्षक-शिक्षिका व शिक्षकेतर कर्मचाऱ्यांचे नियोजनबद्ध मार्गदर्शन आणि अथक परिश्रम असल्याची भावना सर्वत्र व्यक्त होत आहे.

मेरिटमध्ये स्थान मिळविणारे गुणवंत विद्यार्थी

जाधव चेतश्री प्रकाश – २०२ गुण (६७.३३%)

भोसांडे दुर्वेश अमोल – २०२ गुण (६७.३३%)

क्षीरसागर गायत्री गोपाल – १९८ गुण (६६%)

भिवसने हितांशी गजानन – २०० गुण (६६.६६%)

भिवसने ईशानी पांडुलिक – १९८ गुण (६६%)

लोहार कल्पेश गणेश – १९२ गुण (६४%)

सोनवणे कमलेश श्रीराम – २०८ गुण (६९.३३%)

बनकर लोकेश प्रकाश – २१० गुण (७०%)

चौधरी निशा गजानन – १९२ गुण (६४%)

देशमुख यश सागर – २०२ गुण (६७.३३%)

या सर्व विद्यार्थ्यांनी कठोर परिश्रम, शिक्षकांचे मार्गदर्शन आणि पालकांच्या सहकार्यामुळे हे उल्लेखनीय यश संपादन केले आहे.

विद्यालयात शिष्यवृत्ती परीक्षेच्या तयारीसाठी नियमित सराव परीक्षा, विषयानुसार विशेष मार्गदर्शन, वैयक्तिक शंकानिरसन, गुणवंत विद्यार्थ्यांसाठी स्वतंत्र अभ्यासवर्ग आणि सातत्यपूर्ण मूल्यमापन यावर विशेष भर देण्यात आला. त्यामुळे विद्यार्थ्यांचा आत्मविश्वास वाढला आणि त्याचेच रूपांतर आजच्या दैदिप्यमान यशात झाले.

मुख्याध्यापक श्री. पी. एम. सुर्वे यांच्या दूरदृष्टीपूर्ण नेतृत्वाखाली विद्यालयाने गेल्या काही दिवसातच शैक्षणिक गुणवत्ता सातत्याने उंचावली आहे. विद्यार्थीकेंद्रित उपक्रम, शिस्तबद्ध वातावरण आणि गुणवत्तापूर्ण अध्यापनामुळे विद्यालयाने परिसरात वेगळी ओळख निर्माण केली आहे. उपमुख्याध्यापक श्री. आर. जी. बैरागी यांच्यासह सर्व शिक्षकांनी विद्यार्थ्यांना वेळोवेळी प्रेरणा देत प्रत्येक विद्यार्थ्याकडे वैयक्तिक लक्ष दिले. त्यामुळेच हे यश शक्य झाल्याची भावना पालकांनी व्यक्त केली.

यशस्वी विद्यार्थ्यांचे मुख्याध्यापक, उपमुख्याध्यापक, पर्यवेक्षक, सर्व शिक्षक, शिक्षिका व शिक्षकेतर कर्मचाऱ्यांनी मनापासून अभिनंदन केले असून, भविष्यातही अशीच यशाची परंपरा कायम राखण्यासाठी अधिक जोमाने प्रयत्न सुरू ठेवण्याचा निर्धार व्यक्त केला आहे.

दरम्यान, विद्यालयाच्या या उल्लेखनीय यशाबद्दल परिसरातून कौतुकाचा वर्षाव होत असून, "डॉ.जे.जी.पंडित माध्यमिक विद्यालयाची ही उज्ज्वल यशस्वी परंपरा यापुढेही अशाच दिमाखात सुरू राहावी," अशी अपेक्षा पालकांनी व्यक्त केली आहे. विद्यार्थ्यांच्या गुणवत्तेला योग्य दिशा देणारे मुख्याध्यापक, समर्पित शिक्षकवृंद आणि सहकार्य करणारे पालक यांच्या संयुक्त प्रयत्नांमुळे विद्यालय भविष्यातही शैक्षणिक क्षेत्रात नवनवे विक्रम प्रस्थापित करेल, असा विश्वास व्यक्त केला जात आहे.