द युवा ग्रामीण पत्रकार संघाच्या राज्यस्तरीय पदाधिकारी बैठकीत संघटनावाढीचा निर्धार; पत्रकारांच्या प्रश्नांसाठी एकजुटीने लढण्याचे आवाहन

दिशा लाईव्ह न्यूज -:- दिनेश चौधरी, लोहारा

“एकजूट पत्रकारांची, ताकद संघटनेची आणि बांधिलकी समाजाची!” या विचाराला केंद्रस्थानी ठेवत द युवा ग्रामीण पत्रकार संघटनेच्या राज्यस्तरीय पदाधिकाऱ्यांची महत्त्वपूर्ण बैठक उत्साहपूर्ण वातावरणात पार पडली. या बैठकीत संघटनेची आगामी वाटचाल, पत्रकारांच्या विविध समस्या, पदाधिकाऱ्यांच्या जबाबदाऱ्या, संघटनावाढ तसेच सामाजिक बांधिलकी या विषयांवर सविस्तर मार्गदर्शन व विचारमंथन करण्यात आले.

बैठकीस संघटनेचे संस्थापक अध्यक्ष आदरणीय शेख अन्सार सर, राज्य अध्यक्ष आदरणीय शकील मणियार सर तसेच मार्गदर्शक बाळासाहेब कोठुळे यांची प्रमुख उपस्थिती होती. त्यांनी नवनियुक्त राज्य, विभागीय, जिल्हा व तालुका पदाधिकाऱ्यांना संघटनेची भूमिका, पत्रकारितेतील आव्हाने आणि संघटनात्मक कार्याची दिशा याबाबत मोलाचे मार्गदर्शन केले.

पदाधिकारी म्हणजे केवळ पद नव्हे, तर जबाबदारी

बैठकीत राज्यातील विविध भागांतून सहभागी झालेल्या पदाधिकाऱ्यांनी आपल्या कार्यक्षेत्रातील अडचणी, पत्रकारांच्या समस्या तसेच संघटनेच्या भविष्यातील वाटचालीसाठी उपयुक्त सूचना मांडल्या. प्रत्येक पदाधिकाऱ्याने आपल्या भागातील पत्रकार बांधवांशी सातत्याने संपर्क ठेवून त्यांच्या अडचणी जाणून घ्याव्यात आणि शक्य त्या पातळीवर सहकार्य करावे, यावर विशेष भर देण्यात आला.

संघटनेचा पदाधिकारी हा केवळ नावापुरता पदाधिकारी नसून संघटनेचा चेहरा आणि जबाबदार प्रतिनिधी असतो. त्यामुळे प्रामाणिकपणा, संयम, शिस्त, सामाजिक बांधिलकी आणि पत्रकारितेची मूल्ये जपणे अत्यंत आवश्यक आहे. पद मिळणे ही प्रतिष्ठेची बाब असली तरी त्यासोबत मोठी जबाबदारी येते आणि ती प्रत्येकाने मनापासून पार पाडली पाहिजे, असा स्पष्ट संदेश बैठकीत देण्यात आला.

पत्रकारांच्या अडचणीच्या काळात संघटना ठामपणे पाठीशी

पत्रकारिता करताना कोणताही दुजाभाव, व्यक्तिगत आकस अथवा भेदभाव न ठेवता समाजातील प्रत्येक घटकाला न्याय देण्याचा प्रयत्न झाला पाहिजे. एखाद्या पत्रकारावर अन्याय झाला, त्याच्या कामात अडथळा निर्माण झाला किंवा तो अडचणीत सापडला, तर अशा वेळी संघटनेने त्याच्या पाठीशी ठामपणे उभे राहिले पाहिजे.

“एक पत्रकार अडचणीत असताना दुसऱ्या पत्रकाराने पाठ फिरवू नये; उलट संघटनेच्या माध्यमातून त्याला आवश्यक ते मार्गदर्शन व सहकार्य मिळवून द्यावे,” हा महत्त्वपूर्ण विचार बैठकीत मांडण्यात आला.

संघटना केवळ पत्रकारांसाठी नव्हे, तर समाजासाठीही

द युवा ग्रामीण पत्रकार संघटना ही केवळ पत्रकारांच्या प्रश्नांसाठी काम करणारी संघटना न राहता ग्रामीण समाजातील विविध प्रश्नांना वाचा फोडणारी प्रभावी चळवळ म्हणून पुढे यावी, अशी अपेक्षा व्यक्त करण्यात आली.

गावातील रस्ते, पाणी, वीज, आरोग्य, शिक्षण, स्वच्छता, शेतकरी, विद्यार्थी, महिला, ज्येष्ठ नागरिक तसेच सर्वसामान्य नागरिकांच्या समस्या प्रशासनापर्यंत पोहोचविण्यासाठी पत्रकारांनी सक्रिय भूमिका बजावावी. केवळ बातमी प्रसिद्ध करून थांबण्याऐवजी संबंधित प्रश्नांच्या सोडवणुकीसाठी प्रशासनाकडे सकारात्मक पद्धतीने पाठपुरावा करण्याची गरज असल्याचे बैठकीत अधोरेखित करण्यात आले.

 द युवा ग्रामीण पत्रकार संघाची अल्पावधीत राज्यभर संघटनेची ओळख

अत्यंत कमी कालावधीत द युवा ग्रामीण पत्रकार संघटनेने राज्यातील विविध भागांत आपली ओळख निर्माण केली असून संघटनेची वाटचाल यशोशिखराकडे सुरू आहे. मात्र, हा विस्तार केवळ पदांची संख्या वाढवून नव्हे तर सक्रिय, जबाबदार, कार्यक्षम आणि समाजाभिमुख पत्रकारांना जोडून झाला पाहिजे, यावर बैठकीत विशेष भर देण्यात आला.

प्रत्येक जिल्ह्यात संघटना मजबूत करणे, तालुकास्तरावर पत्रकारांचे संघटन उभे करणे आणि ग्रामीण भागातील पत्रकारांना एकत्र आणणे ही काळाची गरज असल्याचे सांगण्यात आले.

जिल्हाध्यक्ष व तालुकाध्यक्षांची भूमिका महत्त्वाची

प्रत्येक जिल्हाध्यक्षाने आपल्या जिल्ह्यातील तालुकाध्यक्षांशी सातत्याने संपर्क ठेवावा, तर तालुकाध्यक्षांनी आपल्या तालुक्यातील पत्रकार बांधवांना संघटनेशी जोडण्यासाठी प्रयत्न करावेत. नवीन पत्रकारांना संघटनेची भूमिका समजावून सांगून त्यांना सक्रिय करणे, तसेच विद्यमान पदाधिकाऱ्यांना योग्य जबाबदाऱ्या देऊन कार्य अधिक गतिमान करणे, यासाठी सर्वांनी पुढाकार घ्यावा, असे आवाहन करण्यात आले.

प्रत्येक जिल्हा व तालुक्यात नियमित बैठका घेणे, पत्रकारांच्या समस्या जाणून घेणे, सामाजिक उपक्रम राबविणे आणि प्रशासनाशी सकारात्मक संवाद ठेवणे यावरही चर्चा झाली.

“संघटना माझ्यासाठी काय करेल?” पेक्षा “मी संघटनेसाठी काय करू शकतो?”

संघटनेची खरी ताकद ही पदाधिकाऱ्यांच्या संख्येत नसून त्यांच्या एकजुटीत, कार्यक्षमतेत आणि योगदानात असते. त्यामुळे प्रत्येक पदाधिकाऱ्याने “संघटना माझ्यासाठी काय करेल?” यापेक्षा “मी संघटनेसाठी काय करू शकतो?” हा विचार करण्याची गरज असल्याचे बैठकीत स्पष्ट करण्यात आले.

पत्रकारांच्या हिताचे प्रश्न मांडतानाच समाजातील दुर्बल घटकांना न्याय मिळवून देण्यासाठी आणि ग्रामीण भागातील जनतेच्या समस्या शासन-प्रशासनाच्या निदर्शनास आणून देण्यासाठी सर्व पदाधिकाऱ्यांनी सक्रिय भूमिका बजावावी, असे आवाहन करण्यात आले.

बैठकीत मार्गदर्शन करणारे संस्थापक अध्यक्ष शेख अन्सार सर, राज्य अध्यक्ष शकील मणियार सर आणि बाळासाहेब कोठुळे यांचे उपस्थित पदाधिकाऱ्यांनी आभार मानले. तसेच संघटनेच्या नवनियुक्त राज्य, विभागीय, जिल्हा व तालुका पदाधिकाऱ्यांचे मनःपूर्वक स्वागत व अभिनंदन करण्यात आले.

संघटनेची वाटचाल अधिक भक्कम करण्यासाठी प्रत्येक पदाधिकारी, पत्रकार बांधव आणि सहकाऱ्याने एकदिलाने काम करावे, पत्रकारितेची मूल्ये जपावीत, सामाजिक बांधिलकी जोपासावी आणि ग्रामीण जनतेच्या प्रश्नांना न्याय मिळवून देण्यासाठी सदैव तत्पर राहावे, असा निर्धार बैठकीत व्यक्त करण्यात आला.

“एकजूट पत्रकारांची, ताकद संघटनेची आणि बांधिलकी समाजाची!”

याच ध्येयविचाराने द युवा ग्रामीण पत्रकार संघटना भविष्यात राज्यभर आणखी व्यापक, सक्षम आणि प्रभावी चळवळ उभी करेल, असा विश्वास यावेळी व्यक्त करण्यात आला.