पिंपळगाव हरेश्वर पोलिसांची भंगार दुकानांवर धडक कारवाई; चोरीच्या संशयावरून ७५ हजारांहून अधिक किमतीच्या कॉपर व ॲल्युमिनियमच्या तारा जप्त, चार जणांवर गुन्हे दाखल

दिशा लाईव्ह न्यूज -:- जळगाव जिल्ह्यातील शेतकऱ्यांच्या शेतातील कॉपर वायर, इलेक्ट्रिक मोटारी, एमएसईबी केबल तसेच सोलर केबल चोरीच्या वाढत्या घटनांना आळा घालण्यासाठी पिंपळगाव हरेश्वर पोलिसांनी मोठी कारवाई केली आहे. चोरीचा मुद्देमाल खरेदी करणाऱ्या भंगार व्यावसायिकांवर वचक निर्माण करण्यासाठी राबवलेल्या विशेष मोहिमेत तब्बल ७५ हजार ४०० रुपये किमतीची कॉपर आणि ॲल्युमिनियमची तार जप्त करण्यात आली असून, चार भंगार दुकानदारांविरुद्ध महाराष्ट्र पोलीस अधिनियमान्वये स्वतंत्र गुन्हे दाखल करण्यात आले आहेत.

विशेष मोहिमेअंतर्गत धाडसत्र:

जळगाव जिल्ह्याचे पोलीस अधीक्षक डॉ. महेश्वर रेड्डी यांच्या मार्गदर्शनाखाली शेती साहित्याची चोरी रोखण्यासाठी आणि असा मुद्देमाल खरेदी करणाऱ्या भंगार विक्रेत्यांवर कारवाई करण्यासाठी विशेष मोहीम हाती घेण्यात आली. त्याअंतर्गत २९ सप्टेंबर रोजी पाचोरा तालुक्यातील पिंपळगाव हरेश्वर पोलीस स्टेशनच्या हद्दीतील वरखेडी, भोकरी तसेच लोहारा दूरक्षेत्र हद्दीतील कुऱ्हाड गावात एकाच वेळी भंगार दुकानांची तपासणी करण्यात आली.

जप्त केलेला मुद्देमाल व आरोपी:

तपासणीदरम्यान खालील भंगार दुकानांतून संशयास्पद मुद्देमाल हस्तगत करण्यात आला:

कलीम नवी काकर (रा. भोकरी): दुकानातून ३२ हजार रुपये किमतीची ३२ किलो कॉपर वायर.

हकीम अब्बाज काकर (रा. भोकरी): दुकानातून १० हजार रुपये किमतीची १० किलो कॉपर वायर.

राजू उस्मान काकर (रा. भोकरी): दुकानातून १ हजार ४०० रुपये किमतीची १४ किलो ॲल्युमिनियम वायर.

अबुबजर हकीम काकर (रा. कुऱ्हाड, लोहारा दूरक्षेत्र): दुकानातून ३२ हजार रुपये किमतीची ३२ किलो कॉपर वायर.

अशा प्रकारे एकूण ७५,४०० रुपये मूल्याचा मुद्देमाल हस्तगत करण्यात आला. या साहित्याबाबत दुकानदारांकडे खरेदी-विक्रीची कोणतीही कागदपत्रे किंवा समाधानकारक पुरावे उपलब्ध नसल्याने त्यांच्याविरुद्ध महाराष्ट्र पोलीस अधिनियम कलम १२४ अन्वये चार वेगवेगळे गुन्हे नोंदवून सखोल चौकशी सुरू करण्यात आली आहे.

 कारवाई करणारे पोलीस पथक:

सदर कारवाई पोलीस अधीक्षक, अप्पर पोलीस अधीक्षक अशोक नखाते (चाळीसगाव परीमंडळ) व उपविभागीय पोलीस अधिकारी बापू रोहम (पाचोरा भाग) यांच्या मार्गदर्शनाखाली पिंपळगाव हरेश्वर पोलीस स्टेशनच्या प्रभारी सहाय्यक पोलीस निरीक्षक कल्याणी वर्मा यांच्यासह पोलीस अंमलदार अतुल पवार, अभिजित निकम, दीपक अहिरे, प्रवीण देशमुख, भारत पाटील, शाम हटकर, मनोज बडगुजर व नामदेव इंगळे यांच्या पथकाने केली.