पाळधीत गणेशोत्सवानिमित्त भव्य कुस्ती दंगल परजिल्ह्यातील नामवंत मल्लांचा उत्स्फूर्त सहभाग; अंतिम प्रतिष्ठेची कुस्ती बरोबरीत

दिशा लाईव्ह न्यूज :-- : मराठी मातीत रुजलेली पारंपरिक कुस्तीची परंपरा जपण्यासोबतच ग्रामीण भागातील युवकांमध्ये व्यायाम व शारीरिक तंदुरुस्तीची आवड निर्माण व्हावी, या उद्देशाने पाळधी येथे गणेशोत्सवानिमित्त भव्य कुस्ती दंगलीचे आयोजन करण्यात आले. महाराष्ट्राच्या विविध भागांतून तसेच दिल्ली येथून आलेल्या मल्लांनी या कुस्ती दंगलीत सहभाग घेतला. रंगलेल्या थरारक सामन्यांनी उपस्थित हजारो कुस्तीप्रेमींमध्ये उत्साहाचे वातावरण निर्माण झाले.

या कुस्ती दंगलीत जळगाव, भुसावळ, चाळीसगाव, जामनेर, पाचोरा, बोदवड, मुक्ताईनगर, मलकापूर, मालेगाव, संभाजीनगर, हळदा, बुलढाणा यांसह विविध भागांतील मल्ल सहभागी झाले होते. परजिल्ह्यातील नामवंत मल्लांच्या सहभागामुळे स्पर्धेला विशेष रंगत आली.

सोळा हजारांची प्रतिष्ठेची कुस्ती बरोबरीत

कुस्ती दंगलीतील अंतिम व प्रतिष्ठेच्या सामन्यात कु-हाड येथील पैलवान पिंटू देशमुख आणि हरसूल येथील आझर मल्ल यांच्यात तब्बल १६ हजार रुपयांची कुस्ती लावण्यात आली. दोन्ही मल्लांनी ताकदीचे व कौशल्यपूर्ण डावपेच करत उपस्थितांची उत्सुकता वाढवली. अखेर ही प्रतिष्ठेची कुस्ती बरोबरीत सोडण्यात आली.

पहूर पोलीस ठाण्याचे सहाय्यक पोलीस निरीक्षक प्रविण दातरे तसेच आयोजकांच्या वतीने मल्लांना मानाची बक्षिसे देऊन गौरविण्यात आले.

महिला कुस्तीपटूची विशेष उपस्थिती; शाल-श्रीफळ देऊन सन्मान

या कुस्ती दंगलीचे आणखी एक आकर्षण म्हणजे दिल्ली येथून आलेल्या महिला कुस्तीपटूचा सहभाग. महिला कुस्तीला प्रोत्साहन मिळावे आणि क्रीडा क्षेत्रातील तिच्या योगदानाचा गौरव व्हावा, या उद्देशाने आयोजकांच्या वतीने तिचा शाल, श्रीफळ व पुष्पगुच्छ देऊन सत्कार करण्यात आला. महिला कुस्तीपटूच्या उपस्थितीचे कुस्तीप्रेमींनी उत्स्फूर्त स्वागत केले.

युवकांसाठी कुस्ती स्पर्धा प्रेरणादायी

कुस्ती हा केवळ खेळ नसून महाराष्ट्राच्या ग्रामीण संस्कृतीचा आणि मातीतल्या परंपरेचा अविभाज्य भाग आहे. कुस्तीच्या माध्यमातून युवकांमध्ये व्यायामाची आवड, शारीरिक क्षमता, शिस्त आणि आत्मविश्वास निर्माण होतो. ग्रामीण भागातील कुस्तीची ही परंपरा पुढील पिढीपर्यंत पोहोचण्यासाठी अशा कुस्ती दंगलींचे आयोजन सातत्याने होणे गरजेचे असल्याची भावना उपस्थित कुस्तीप्रेमींनी व्यक्त केली.

आयोजक व पंचांचे योगदान

कुस्ती दंगल यशस्वी करण्यासाठी कमलाकर पाटील, प्रमोद शिंपी, देवचंद परदेशी, कय्युम पठाण, विकास चौधरी, पप्पू जाधव, जशवंत परदेशी, विश्वजीत पाटील, सचिन पाटील, विजय परदेशी, सत्यवान पाटील, विनोद पाटील, दीपक परदेशी, विनोद कोळी, खुशाल परदेशी, अतुल बाविस्कर, संजय शेवाळे, अतुल जाधव, जितू धनगर यांनी परिश्रम घेतले. यातील अनेकांनी पंच म्हणूनही जबाबदारी पार पाडली.

कार्यक्रमास भाजपा पश्चिम तालुकाध्यक्ष कमलाकर पाटील, जे. के. चव्हाण, जितू पाटील, चंद्रकांत बाविस्कर, दीपक तायडे, प्रफुल महाजन, सचिन पाटील यांच्यासह ग्रामस्थ, मल्ल, पंच आणि कुस्तीप्रेमी मोठ्या संख्येने उपस्थित होते.

कुस्ती दंगलीदरम्यान कायदा व सुव्यवस्था अबाधित राहावी यासाठी पहूर पोलीस ठाण्याचे सहाय्यक पोलीस निरीक्षक प्रविण दातरे यांच्या मार्गदर्शनाखाली पोलीस कर्मचारी बंदोबस्तासाठी तैनात करण्यात आले होते.

गणेशोत्सवाच्या उत्साहाला कुस्तीच्या थराराची जोड मिळाल्याने पाळधी येथील ही कुस्ती दंगल कुस्तीप्रेमींसाठी विशेष आकर्षण ठरली.