मेणगावसाठी सुवर्णक्षण : वर्षानुवर्षे प्रलंबित रस्त्याला अखेर मंजुरी

  मेणगाव (ता. जामनेर, जि. जळगाव) 

दिशा लाईव्ह न्यूज -:----गावाच्या विकासाचा मार्ग अनेकदा संघर्षातूनच तयार होतो, याची प्रचिती मेणगावकरांना पुन्हा एकदा आली आहे. गेल्या अनेक वर्षांपासून प्रलंबित असलेला आणि ग्रामस्थांसाठी अत्यंत महत्त्वाचा असलेला मेणगाव–सोयगाव जोडरस्ता अखेर मंजूर झाला असून, हा क्षण गावासाठी खऱ्या अर्थाने “सुवर्णक्षण” ठरला आहे.

मेणगावच्या स्वागत द्वारापासून ते सोयगाव हद्दीतील मेणगाव फाट्यापर्यंतचा हा अल्प अंतराचा रस्ता अनेक वर्षांपासून रखडला होता. भौगोलिकदृष्ट्या जळगाव जिल्ह्याच्या टोकाला व मराठवाडा सीमेजवळ असलेल्या या भागातील ग्रामस्थांना या रस्त्याअभावी मोठ्या अडचणींचा सामना करावा लागत होता. अनेकदा पाठपुरावा करूनही केवळ आश्वासने मिळत होती, मात्र प्रत्यक्षात काहीच घडत नव्हते.

परंतु, गावातील माजी सरपंच श्री सुरेश भाऊ पाटील यांच्या पुढाकाराने आणि ग्रामपंचायतीचे विद्यमान सरपंच, उपसरपंच, आणि सर्व सदस्य यांच्या प्रयत्नांमुळे या प्रश्नाला नवे बळ मिळाले. या प्रयत्नांची दखल घेत राज्याचे मान्यवर नेते श्री गिरीश भाऊ महाजन, तसेच श्री जे. के. चव्हाण आणि एम. एम. पाटील यांच्या समन्वयातून हा महत्त्वाचा रस्ता मंजूर करण्यात आला.

हा रस्ता मंजूर झाल्यामुळे मेणगावचा संपर्क थेट सोयगाव, अजिंठा तसेच जरंडी–निंबायती महामार्गाशी अधिक सुलभ होणार आहे. परिणामी, ग्रामस्थांच्या दैनंदिन प्रवासात मोठी सोय होणार असून व्यापार, शिक्षण आणि आरोग्य सेवांपर्यंत पोहोच अधिक वेगवान होणार आहे.

या आनंददायी निर्णयानंतर मेणगाव ग्रामस्थांनी श्री जे. के. चव्हाण यांच्या निवासस्थानी भेट देऊन त्यांचे मनःपूर्वक आभार व्यक्त केले. यावेळी माजी सरपंच श्री सुरेश भाऊ पाटील, श्री अनिल भाऊ बोरसे, श्री जगदीश भाऊ धुमाळ ,हरी नारायण महाजन,आणि श्री विलास भाऊ पाटील उपस्थित होते.

ग्रामस्थांच्या मते, “हा रस्ता फक्त मातीचा मार्ग नाही, तर आमच्या विकासाचा महामार्ग आहे.”

तसेच, या कामासाठी पूर्वी प्रयत्न करणाऱ्या सर्व मान्यवरांचे योगदानही तेवढेच महत्त्वाचे असल्याचे गावकऱ्यांनी नमूद केले.

मेणगावच्या विकासाला गती देणारा हा रस्ता भविष्यातील प्रगतीचा मजबूत पाया ठरणार आहे. अनेक वर्षांच्या प्रतीक्षेनंतर मिळालेला हा निर्णय ग्रामस्थांच्या एकजुटीचा आणि सातत्यपूर्ण प्रयत्नांचा विजय मानला जात आहे.!