बांबरुड परिसरात तीव्र उष्णतेचा कहर; पिकांचे मोठे नुकसान, शेतकऱ्यांची पिक वाचवण्यासाठी जीवाची झुंज

 शिवाजी सुतार--बांबरुड (ता. पाचोरा) प्रतिनिधी:

दिशा लाईव्ह न्यूज--::----तालुक्यातील बांबरुड परिसरात सध्या तीव्र उष्णतेची लाट उसळली असून याचा मोठा फटका शेती पिकांना बसत आहे. दिवसेंदिवस वाढत चाललेल्या तापमानामुळे शेतकरी वर्ग चिंतेत सापडला असून आपल्या पिकांचे संरक्षण करण्यासाठी अक्षरशः जीवाचे रान करताना दिसत आहेत.

गत काही दिवसांपासून तापमानाने ४४ ते ४५ अंश सेल्सियसचा टप्पा ओलांडला आहे. त्यामुळे जमिनीतील आर्द्रता झपाट्याने कमी होत असून पिके करपण्याच्या मार्गावर आहेत. विशेषतः केळी, भाजीपाला आणि इतर बागायती पिकांवर उष्णतेचा तीव्र परिणाम दिसून येत आहे.

शेतकरी सांगतात की, पाण्याची कमतरता ही सध्या सर्वात मोठी समस्या ठरत आहे. परिसरातील विहिरी, बोअरवेल यांमधील पाण्याची पातळी घटल्याने पिकांना वेळेवर पाणी देणे कठीण झाले आहे. परिणामी अनेक ठिकाणी पिके सुकू लागली असून उत्पादनावर मोठा परिणाम होण्याची शक्यता निर्माण झाली आहे.

याच पार्श्वभूमीवर काही शेतकरी विविध उपाययोजना राबवताना दिसत आहेत. पिकांना उन्हापासून संरक्षण मिळावे म्हणून शेडनेटचा वापर, झाडांच्या मुळाशी गवताचे आच्छादन (मल्चिंग), तसेच ठिबक सिंचन पद्धतीचा अवलंब केला जात आहे. काही ठिकाणी केळीच्या बागांमध्ये पानांवर पाणी फवारून तापमान कमी करण्याचा प्रयत्न केला जात आहे.

तज्ज्ञांच्या मते, वाढत्या उष्णतेमुळे केवळ पिकांनाच नव्हे तर फळांच्या गुणवत्तेलाही फटका बसतो. फळे लहान राहणे, गळून पडणे किंवा त्यांचा रंग व चव बिघडणे अशा समस्या वाढू लागतात. यामुळे शेतकऱ्यांचे आर्थिक नुकसान होण्याची भीती व्यक्त केली जात आहे.

दरम्यान, या उष्णतेचा परिणाम जनजीवनावरही जाणवत असून जनावरांनाही त्रास सहन करावा लागत आहे. त्यामुळे पशुपालकांनीही जनावरांना सावली, पुरेसे पाणी आणि योग्य काळजी देणे गरजेचे ठरत आहे.

एकूणच, बांबरुड परिसरात उष्णतेचा वाढता प्रकोप हा शेतीसाठी मोठे आव्हान बनला असून शासनाने तातडीने मदत व उपाययोजना कराव्यात, अशी मागणी शेतकरी वर्गातून होत आहे.