दुष्काळग्रस्त शेतकऱ्यांच्या विद्यार्थ्यांसाठी बससेवा मोफत करा शिवसेना-युवासेनेचे जामनेर तहसीलदारांना निवेदन; विद्यार्थ्यांच्या शिक्षणाला आर्थिक अडचणींचा अडथळा ठरू नये, अशी मागणी

दिशा लाईव्ह न्यूज :- : तालुक्यासह जिल्ह्यात दुष्काळाचे गंभीर सावट निर्माण झाले असून, राज्य सरकारने दुष्काळ जाहीर केला आहे. या पार्श्वभूमीवर दुष्काळग्रस्त शेतकरी कुटुंबातील विद्यार्थ्यांना शिक्षणासाठी करावा लागणारा प्रवास आर्थिकदृष्ट्या परवडणारा व्हावा, यासाठी विद्यार्थी मुलांसाठीही मुलींप्रमाणे एसटी बससेवा मोफत करण्यात यावी, अशी मागणी शिवसेना-युवासेनेच्या वतीने करण्यात आली आहे. याबाबत मंगळवार, दि. ६ ऑक्टोबर २०२६ रोजी जामनेर तहसील कार्यालयात निवेदन देण्यात आले.

दुष्काळामुळे शेतकरी कुटुंबांची आर्थिक परिस्थिती मोठ्या अडचणीत सापडली आहे. पावसाअभावी शेतीचे उत्पादन घटले असून, शेतकऱ्यांसमोर कुटुंबाचा उदरनिर्वाह, शेतीचा खर्च तसेच मुलांच्या शिक्षणाचा खर्च भागविण्याचे मोठे आव्हान उभे राहिले आहे. अनेक विद्यार्थी उच्च माध्यमिक, महाविद्यालयीन तसेच व्यावसायिक शिक्षणासाठी तालुक्याच्या किंवा जिल्ह्याच्या ठिकाणी दररोज एसटी बसने प्रवास करतात. अशा विद्यार्थ्यांना दररोजच्या प्रवासाचा खर्च करणे दुष्काळग्रस्त कुटुंबांसाठी आर्थिकदृष्ट्या जड जात आहे.

‘मुलींप्रमाणे मुलांनाही मोफत बससेवेचा लाभ द्यावा’, अशी मागणी निवेदनाद्वारे करण्यात आली. दुष्काळग्रस्त शेतकरी कुटुंबातील विद्यार्थ्यांना शिक्षणापासून वंचित राहावे लागू नये, तसेच केवळ आर्थिक अडचणीमुळे विद्यार्थ्यांच्या शिक्षणात खंड पडू नये, यासाठी शासनाने तातडीने सकारात्मक निर्णय घ्यावा, अशी अपेक्षा शिवसेना-युवासेनेने व्यक्त केली.

दुष्काळाच्या परिस्थितीत शेतकरी कुटुंबांना शासनाकडून विविध प्रकारच्या सवलती व मदतीची आवश्यकता आहे. त्याचबरोबर शिक्षण हा विद्यार्थ्यांच्या भवितव्याचा महत्त्वाचा आधार असल्याने शिक्षणासाठी होणारा प्रवासही सुलभ आणि आर्थिकदृष्ट्या परवडणारा करणे गरजेचे आहे. ग्रामीण भागातील अनेक विद्यार्थी दररोज लांबचा प्रवास करून शिक्षण घेतात. त्यामुळे बसपासचा खर्च माफ झाल्यास अशा कुटुंबांना मोठा दिलासा मिळू शकतो.

शासनाने मुलींसाठी मोफत प्रवासाची सुविधा उपलब्ध करून दिली आहे. त्याच धर्तीवर दुष्काळग्रस्त शेतकरी कुटुंबातील विद्यार्थी मुलांनाही मोफत बससेवेचा लाभ द्यावा, अशी मागणी करण्यात आली. यामुळे आर्थिक अडचणीतील विद्यार्थ्यांना शिक्षण सुरू ठेवण्यास मदत होईल आणि दुष्काळाचा त्यांच्या शैक्षणिक भवितव्यावर होणारा परिणाम कमी करता येईल, असे निवेदनात नमूद करण्यात आले आहे.

               शिवसैनिक-युवासैनिकांची उपस्थिती

निवेदन देताना शिवसेना तालुकाप्रमुख ॲड. भरतजी पवार, युवासेना जिल्हाध्यक्ष विश्वजितराजे मनोहर पाटील, युवासेना तालुकाध्यक्ष विशालभाऊ लामखेडे, नगरसेवक भैय्याभाऊ गुजर, युवासेना विधानसभा संपर्कप्रमुख अरुणभाऊ सावकारे, कृष्णाभाऊ चोरमारे, यशभैय्या बरडे, कैलासभाऊ माळी, महेबुबभाऊ तडवी, पंडितदादा नाईक, प्रविणभाऊ ठाकरे, राहुलभाऊ चौधरी, सुनीलभाऊ पाटील, गोपालभाऊ पाटील, प्रेमभाऊ पवार, निखिलभाऊ पाटील, विक्रमभाऊ घोंगडे, अमितभाऊ तडवी, राकेशभाऊ चौधरी, मुख्तारदादा शेख, भूषणभाऊ चौधरी यांच्यासह अनेक शिवसैनिक व युवासैनिक उपस्थित होते.

दुष्काळग्रस्त शेतकरी कुटुंबातील विद्यार्थ्यांच्या शैक्षणिक भवितव्याचा विचार करून शासनाने या मागणीचा गांभीर्याने विचार करावा आणि विद्यार्थ्यांना तातडीने मोफत बससेवेची सुविधा उपलब्ध करून द्यावी, अशी मागणी यावेळी करण्यात आली.